Ուրբաթ, Օգոստոսի 1, 2014





Գլխավոր

Նախագահի ուղերձը

  

Սիրելի՛ բարեկամ,

«Առաքելություն Հայաստան» բարեգործական հասարակական կազմակերպությունը գործում է ավելի քան երկու տասնամյակ։
Որդեգրելով կարիքավոր մարդկանց աջակցելու առաքելությունը՝ մենք այսօր հպարտորեն կարող ենք նշել, որ այս երկար տարիների ընթացքում ներդրել ենք բոլոր ջանքերն՝ այն կյանքի կոչելու համար։
Մեր անձնազոհ նվիրումը ոչ միայն աջակցել է հազարավոր մարդկանց, այլեւ իմաստալից ու արգասաբեր է եղել հենց մե՛զ համար. մարդու կերպին ու կոչումին արժանի գործով զբաղվելու, աղքատից աղքատին անշահախնդրորեն աջակցելու այս առաքելությունը հոգեպես հարստացրել եւ հասունացրել է մեզ։
Մենք հատկապես արժեւորում ենք այն, որ 1988թ.-ի աղետալի երկրաշարժից եւ պատերազմից տուժած հայրենակիցներին օգնելու անկեղծ մղումով միավորած մի խումբ նվիրյալներ խիզախությամբ, երբեք չերկնչելով ո՛չ ֆինանսական, ո՛չ հոգեբանական եւ ո՛չ էլ համակարգային բազում, երբեմն էլ անլուծելի խոչընդոտներից, ամենօրյա հետեւողական աշխատանքով կարողացան ստեղծել սոցիալական ծառայությունների մի ողջ կայսրություն։
Հպարտ ենք նաեւ, որ մեր ինքնաբուխ գործունեությունն այսօր վերաճել է ՀՀ սոցիալական աջակցության բնագավառում սոցիալական ծառայությունների մատուցման փորձառությամբ ու գիտելիքներով իր բացառիկ տեղն ունեցող հզոր հասարակական կառույցի։
Կազմակերպությունը հազարավոր միայնակ տարեցների, հաշմանդամների, փախստականների եւ շատ ու շատ այլ անապահով անձանց համար դարձել է հույսի եւ ապահովության ուրույն հանգրվան։
«Առաքելություն Հայաստան» ԲՀԿ կառույցները տարիների ընթացքում բազմիցս ապացուցել են իրենց անհրաժեշտությունը, նպատակահարմարությունը եւ, որ ամենակարեւորն է, արժանացել են կարիքավոր մարդկանց օրհնանքին, ինչպես նաեւ իշխանությունների ամենաբարձր գնահատանքին։
Սակայն երկու տասնամյակների ընթացքում ստեղծված ծառայությունների այս կուռ համակարգը, որն ընդգրկում է հանրապետության գրեթե ողջ տարածքը, մատուցվող ծառայությունների կենսական անհրաժեշտությամբ հանդերձ, այսօր կանգնել է կայունության եւ շարունակականության ապահովման լուրջ խնդրի առջեւ։ Այս խնդրի լուծմամբ է պայմանավորված ոչ միայն հազարավոր կարիքավոր մարդկանց կենսագործունեությունը, այլեւ երկար տարիների ընթացքում ստեղծված, ո՛չ պետական եւ ո՛չ էլ հասարակական հատվածում այլընտրանքը չունեցող ողջ սոցիալական համակարգի լինելությունը։ Այստեղ է, որ Ձեր աջակցությունը կարող է վճռորոշ լինել։
Մենք կոչ ենք անում Ձեզ եւս մասնակից դառնալ այս մեծ առաքելությանը՝ հրավիրելով սերտ համագործակցության մեր ժողովրդի առավել անապահով զավակներին սատար կանգնելու գործում։
Հրավիրելով Ձեզ համագործակցության` վստահ եմ, որ մեր փորձառությունն ու գիտելիքները զուգակցվելով Ձեր եռանդի հետ, կարող ենք հրաշքներ գործել։
Այս կայքում մանրամասն ներկայացված են «Առաքելություն Հայաստան» ԲՀԿ ենթակառույցներն ու իրականացվող ծրագրերը։

Ձեր արձագանքների ակնկալիքով,
Խորին հարգանոք՝

«Առաքելություն Հայաստան» ԲՀԿ նախագահ՝ Հռիփսիմե Կիրակոսյան

 



Մենք եւ մեր շահառուները ( ֆիլմ )...

Առաքելություն Հայաստան համառոտ ակնարկ



Այցելուների քանակ
08471



Follow MissionArmenia on Twitter    MissionArmenia on Facebook